Agtaltalinaed ita iti Red Alert Status ti Barangay Dalupirip Itogon, Benguet kagiddan ti panakaobserbar ti Semana Santa.
Iti panakiuman iti Bombo Radyo kenni Barangay Kapitan Paul Camantiles, kadawyan a maob-obserbanda ti panakapasamak dagiti kaso ti panakalmes iti Agno River kasta metten dagiti maak-aksidente.
Sigun kenni Camantiles, saan laeng a tunggal Semana Santa a nakaalerto dagitoy nu di ket nakaalertoda metlaeng tunggal summer vacation.
Innayon ti opisyal a katulunganda ti komunidad para ti panagmonitor ken panagbantay nangruna iti karayan.
Inlawlawagna nga ammon dagiti residente sadiay dagiti aramiden ken saanda nga aramiden.
Sigun kenkuana, dagiti laeng bisita wenno turista ti imonmonitor dagitoy nu sadino, dagiti residente pay nukwa a mismon ti mangipakaammo wenno maki-coordinate kadagiti opisyales ti barangay nu adda makitada a sumangbay a turista wenno bisita.
Kabayatanna, nagpalagip ni Kapitan Camantiles kadagiti amin nangruna dagiti turista wenno bisita a liklikan dagitoy ti aglangoy iti karayan gapu ta delikado, kasta metten a tapno maliklikan ti saan nasayaat a pasamak.//Bombo Noveh Organo
