BAGUIO CITY – Impasigurado ti dadaulo ti Hangar Vegetable Market Association nga awan ti mailaklako nga smuggled/imported a nateng iti merkado publiko ditoy siudad ti Baguio.
Kasaruno daytoy ti damag nga adda dagiti repolyo a nagapu China nga iligal a naiserrek iti pagilian ken mailaklakon iti nagduduma a paset ti pagilian, pakairamanan ti Hangar Market ditoy siudad.
Iti panakiuman ti Bombo Radyo Baguio kenni Sonny Benedicto, dadaulo ti nasao nga asosasyon sadiay Hangar Market, kinunana a nagapu iti Benguet ken Vizcaya dagiti amin a nateng a mailaklako sadiay,
Nupay kasta, dinakamatna a nasken a tutukan dagiti maseknan nga ahensia ti gobyerno dagiti maiserserrek a nateng ti pagilian tapnu saan a maapektaran dagiti mannalon iti lokalidad nangruna ita a dakkel ti lugi dagiti mannalon gapu iti mapaspasaran a panagtudo.
Kabayatanna, imbinglay ni Benedicto a bimmassit ti suplay ti nateng ita a maiturturong iti merkado ti siudad nupay umdas latta a mailako kadagiti umili.
Inaklonna met a kimmapoy ti panaglakoda ti nateng kagiddan ti kaawan dagiti turista a sumsumrek iti siudad.
Imbinglayna pay nga iti agdama ket nangina dagiti highland ken lowland vegetables a mailaklako iti merkado publiko ti siudad nga intunda ti epekto ti napasaran a nepnep.
Nupay kasta, nagyaman daytoy gaputa adda latta dagiti gumatgatang kadagiti lakoda a nateng isut gapu nga awan ti madadael wenno masayang iti lako dagitoy.
Naobserbaranda pay a saggabassit ita ti gatgatangen dagiti kostumerda no idilig kadagiti napalpalabas.
