BAGUIO CITY – Posible a mangisayangkat iti imbestigasyon ti lokal a gobierno ti Benguet mainaig iti maipadpadamag a panakailako dagiti smuggled a nateng iti merkado sadiay Manila.
Sigun kenni Governor Melchor Diclas, daytoy ket maisayangkat tapnu makumpirma ti kinapudno ti nasao a damag.
Kinunana a ti agbalin a resulta ti imbestigasyon ket agserbi a basaran ti provincial government iti agbalin nga aksyon daytoy.
Dinakamatna nga indanun dagiti vegetable truckers ken traders sadiay Divisoria ti presensia dagiti mapapati nga smuggled a nateng a carrots ken patatas.
Napagsaritaan ti nasao nga impormasyon iti taripnong ti Inter-Agency Corona Virus Task Force ti Benguet idi napalabas a lawas.
Nupay kasta, impetteng ni Governor Diclas a nasken a mapaneknekan ti nasao nga damag tapu mabigbig met dagiti kaskenan nga aksiyon nga ipatungpalda.
Innayonna a nasken nga isaganaan dagiti traders iti Benguet ken ti lokal a gobyerno ti probinsia tapnu saan a maapektaran ti industriya ti nateng iti Benguet iti kanito a pudno ti nasao nga impormasyon.
