BAGUIO CITY – Dumanon itan iti nasurok kagudwa a milyon a pisos ti pakabuklan a danyos ti nagduduma nga insidente ti uram iti rehion Cordillera iti 2021.
Iti panakiyuman ti Bombo Radyo Baguio, imbinglay ni Senior Fire Officer 1 Leo Mendoza, Public Information Officer ti BFP-Cordillera a pakabuklanen a P550,500 ti nairekordda a danyos ti agpada nga structural ken non-structural fire incendents iti intero a tawen.
Kinunana a saan pay a karaman ditoy ti danyos iti kaudian nga uram ditoy Baguio City a nakatayan ti dua nga indibidual.
Sigun kenkuana, adayo a nangatngato daytoy no ikumpara iti nailistada a nasurok P372K idi napalabas a tawen.
Manipud iti pakabuklan a gatad, nailista ti 18 nga insidente ti uram ita a tawen a buklen ti innem a non-structural fire ken 12 a non-structural fire incidents no sadino nangatngato no idilig iti 12 nga insidente ti uram a rinespondean dagiti otoridad idi napalabas a tawen.
Sigun pay kenni SFO1 Mendoza, ti laeng probinsia ti Kalinga ti awan nailistana nga insidente ti uram ita a tawen.
Inaklonna pay a ngimmato dagiti fire insidents iti laksid ti inaldaw nga OPLAN PAMAYANAN on the ROAD ti ahensia iti probisia ti Benguet ken siudad ti Baguio.
Kabayatana, na-activate idi kalman ti Command System Center ti Bureau of Fire Protection- Cordillera tapno mapapintas ken mapapartak pay ti panagresponde ti ahensia kadagiti insidente ti uram iti lokalidad.
Dinakamat ni Senior Fire Officer 1 Leo Mendoza, Public Information Officer ti BFP-Cordillera a paset iti nasao a system center ti Oplan Paalala Iwas Paputok 2021 a mangibalbalakad iti publiko kadagiti rumbeng nga aramidenda tapno maliklikan ti panakapasamak ti uram.
Karaman pay ditoy ti Operating Task Group Structure a mangidaulo kadagiti respond teams ti ahensia a kontra kadagiti insidente ti uram.
Idauluan daytoy ti regional director ti BFP-Cordillera kas chairperson ken ti assistant Regional Director for Operations kas vice-chairperson bayat a miembro met dagiti nagduduma a yunit ken opisina ti nasao nga ahensia.
Idi kalman, dinakamat ni SFO1 Mendoza a nagtataripnong dagiti amin a fire stations iti rehion seknan iti panakabiag ti OPLAN PAMAYANAN on the ROAD nangruna ta masuktanen ti agdama a tawen.
