Dumanon iti agarup P21 million ti danyos ti typhoon Aghon iti sektor ti agrikultura, sigun iti National Disaster Risk Reduction and Management Council (NDRRMC).
Maibasar iti kaudian a datos, dumanon iti 369 a mannalon ken mangngalap ti naapektaran.
Malaksid iti dayta, agarup 292.9 nga ektarya dagiti mula ti nadadael kasta met a dumanon iti agarup P448-K ti danyos iti livestock, poultry ken iti fisheries.
Kangrunaan a ti rehiyon CALABARZON ti naapektaran ken sarunoen ti Bicol Region.
Kabayatanna, pito ti pimmusay ken kaadoan kadagitoy ket manipud Quezon province.
Manamnama met ti panakaipaay ti agarup P6.7 million nga assistance idiay CALABARZON, MIMAROPA, Bicol, ken Central Visayas.
Maipalagip a ti bagyong Aghon ket rinumwar iti Philippine Area of Responsibilty idi kalman.
