BAGUIO CITY – Nagduduma nga isyu ti natalantan iti naangay a Debate sa Bombo dagiti kandidato iti kina-mayor ditoy siudad ti Baguio idi agsapa.
Innem kadagiti siyam a mayoralty candidates ti Baguio ti dimmar-ay iti debate.
Dagitoy ket da Retired General Benjamin Magalong, Engr. Tony Boy Tabora, incumbent councilor Atty. Edgar Avila, human rights lawyer Atty. Jose Molintas, sigud a barangay kagawad Labio Calingayan ken sigud a City Tourism Officer Benedicto Alhambra.
Sinungbatan ken impeksada ti takderda kadagiti nagduduma a pakaseknan iti Baguio kas iti isyu iti panagbalin nga overdeveloped ti siudad, panakaital-o ti balanse a panagduras kagiddan ti panakasalwad ti nakaparusaan ken dagiti natural resources ken ti otonomiya ti Cordillera.
Impaayda pay ti takderda iti isyu ti kaawan building permit dagiti naipasdek ken maipasdek paylaeng a babbalay nangruna dagiti awanan ti land titles, ti kaawan paradaan dagiti business establishments ken panangsakop dagitoy kadagiti sidewalks, ti manarimaan a night market sadiay Harisson Road ken ti nabayag a parikut iti sugal ditoy siudad.
