Naituding nga iyuswat ti Department of Health (DOH) ti dengue prevention drive iti pagilian inton Pebrero baente kuatro, iti agdama a tawen.
Maiyuswat ti “Alas Kwatro, Kontra Mosquito!” campaign kas paset ti nainget a panagregget a manglapped ken mangkontrol iti dengue iti intero nga opisina ti gobierno iti intero a pagilian.
Iti pablaak ti social media, kinumpirmar ti nasao nga ahensia a ti official kick-off event a napauloan ti ‘Nationwide Search and Destroy Mosquito Breeding Sites Campaign,’ ket maangay iti alas kuatro ti malem inton Lunes.
Panggep ti nasao nga addang a mapasayaat ti komunidad babaen ti panangikkat kadagiti pagpaaduan ti lamok ken pananglapped iti panagwaras ti dengue.
Gapu iti dayta, guyguyuguyen ti nasao nga ahensua ti pannakitinnulong ti publiko, nangruna dagiti lugar idiay Iloilo, Quezon City,Antique, Guimaras, Aklan, Zamboanga del Sur, Misamis Occidental, Misamis Oriental, Lanao del Norte ken dadduma pay a lugar.
Ti programa ket maisayangkat kasaruno ti pannakaideklara ti Quezon City a dengue outbreak gapu iti panagngato ti kaso, ken agarup sangapulo ti nailista a pimmusay ita a tawen.
Maibasa iti kaudian a datos, nakairekord ti Pilipinas iti 28,234 a kaso ti dengue manipod Enero a uno agingga Pebrero a uno, uppat a pulo a porsiento a panagngato nu idilig iti agpada a panawen idi napalabas a tawen.
