Nagpalagip ti Department of Transportation kadagiti biyaheros a dagus dagitoy nga iuman iti opisinada dagiti konduktor ken drivers ti PUVs nga agipakita iti saan a nasayaat nga ugali bayat ti biyahe nagnangruna ita a summer vacation nu sadino adu dagiti agaramat iti PUVs.
Iti pannakiuman ti Bombo Radyo kenni Atty Joshua Pablito, Regional Director ti Department of Transportation, Land Transportation Office, Land Transportation Franchising and Regulatory Board-kinunana nga iti kanito a mangipakita ti maysa a PUV driver iti saan a nasayaat nga aksyon kas iti reckless driving ket posible a maawanan daytoy iti driver’s license.
Kagiddan dayta, binalaaganna met dagiti PUV drivers nga adu ti eggemda a biag nu mangibiyaheda kadagiti PUVs rason a kasapulanda ti utmost diligence nu agmaneho dagitoy kadagiti pampubliko a lugan.
Kabayatanna, imbinglayna met nga agtultuloy ti monitoringda kadagiti overload trucks nu sadino adda ti koordinasyonda iti Department of Public Works and Highways seknan iti daytoy.
Malaksid iti dayta, innayonnana met a saanda latta a sumardeng a mangipatungpal iti anti colorum drive.
