La Trinidad, Benguet- Indaolwan ti Department of Education Schools Division ti Benguet ti maysa a send off ceremony para kadagiti 810 a delegado ti probinsia a makipartisipar iti Cordillera Administrative Region Athletic Association wenno CARAA meet 2025 a maipatungpal inton Pebrero 23-28, 2025.
Iti mensahe ni DepEd CAR Regional Director Estela Leon Carino, nga agdama nga Officer-In-Charge ti School Division Benguet Office, ginuyugoyna dagiti atleta ken coaches nga ipaay dagitoy ti amin a kabaelanda iti regional meet ken ipariknada ti nabara a panagsangaili kadagiti participants manipud iti nagduduma a probinisa ken suidad ti Cordillera.
Nagkari met ni Benguet Cong. Eric Go Yap a mangipaay iti insentibo kadagiti atleta a makaiyawid ti medalya katukad iti cash reward manipod iti Benguet province.
Innayon pay ni Cong Yap a gundaway ti Benguet nga ipakita ti dakkel a nagdur-asan ti Wangal Sports Complex babaen kadagiti baro a sports facilities kas iti track and field oval, Benguet Multi purpose gymnasium ken ti state of the art nga Aquatic Center.
Sigun met kenni Governor Melchor Diclas, ti CARAA hosting ket kasapulan nga ipannakel ti Benguet gaputa ditoy a maishowcase wenno maipannakel dagiti baro a pagay-ayaman.
Kabayatanna, maysa a litson baka ken dadduma pay a taraon ti insagana ni Cong. Yap nga isu ti pinagsasanguan ti intero a delegasyon ti Benguet.//Via Bombo Jordan Tablac
