BAGUIO CITY–Mangipatungpal ti monitoring ti Diocese of Baguio kadagiti pamilya nga impaayanda iti P4,500 a rental assistance a naapektaran iti panagdalapos ti Bagyo nga Ompong sadiay Itogon, Benguet.
Daytoy ket kalpasan a naduktalanda nga adda dagiti sumagmamano a nagnumar iti nasao nga assistance a kabaelanda met nga agbayad iti renta dagitoy.
Sigun kenni Fr. Manny Flores, dadaulo ti Social Action Center ti Diocese Baguio, tarigagayda a mangipaay iti nadardaras a tulong kadagiti biktima ti nasao a kalamidad ngem saanda a nasukimat dagiti indibidual a maikari nga agnumar iti tulong.
Kinunana a prayoridadda nga ipaayan dagiti agkasapulan nangruna dagiti napukawan iti balay.
Maibasar iti record dagitoy, dumanon iti nasurok 300 a pamilya ti nagnumar iti nasao a rental assistance.
