Naduktalan dagiti kameng ti 17th Infantry Battallion ti panggep ti dagiti rebelde a grupo nga isabotahe ti disaster relief operation ti tropa ti Philippine Army iti nagbeddengan ti Luna Apayao ken Lasam Cagayan idi July 27, 2023.
Iti interview ti Bombo radyo kenni Army Captain Rigor Pamittan, ti spokesperson ti 5th Infantry Division naawatda manipud iti concerned citizen ti mensahe maipapan iti presenya dagiti rebelde a grupo iti nasao a lugar.
Nupay kasta impeksa ni Captain Pamittan a dagos nga nangipatungpal iti beripikasyon iti nasao nga mensahe dagiti kameng iti 17th Infantry Battallion ken tapno matuntun ti lugar a posible a nagtuadan dagiti armado a grupo.
Bayat iti panangpaneknek dagiti tropa iti 17th Infantry Battallion napasamak ti rinupak iti nasao a lugar.
Innayon pay ti opisyal a nagbayag iti agarup baente a minutos ti nasao a rinnupak.
Narekober met dagiti tropa ti 17th Infantry Battallion manipud iti nakapasamakan ti engkwentro ti dua a nangangato a kalibre iti paltog ken daduma pay nga alikamen a panggubat ti nasao a rebelde a grupo.
Pakairamanan dagiti armas a narekober dagiti kameng iti Philippine Army ti M16, M14, bala, magazine, improvised explosive device ken personal nga usar.
Awan met ti naireport a nadangran iti grupo ti 17th Infantry Battallion ken saan pay a naduktalan nu adda iti nadangran benneg dagiti terrorista a grupo.
Nupay kasta agtultuloy ti hot pursuit operation para iti pakabigbigan dagiti terrorista a grupo ken tapno saanda a maituloy ti planoda iti agtultuloy a disaster relief operation ti gobyerno.
