Impakaammo ni Justice Secretary Jesus Crispin Remulla a posible a makitinnulong dagitoy iti International Criminal Police Organization wenno Interpol kaspangarigan adda dagiti opisyales wenno kontratista nga aglibas wenno rumwar iti pagilian apaman a marugyan ti imbestigasyon ken panakaipila iti kaso mainaig kadagiti isyu dagiti ghost flood control projects.
Sigun kenni Remulla,dagus a maipaiyulog ti Hold Departure Order wenno travel ban kadagiti karaman nga indibidwal apaman a marugyan ti imbestigasyon tapno saanda a makatalaw.
Kaspangarigan makaruaren dagitoy paturong iti ballasiw-taaw, ditoyen a sumrek ti Interpol nu sadino, mabalin a mangiruar ti Pilipinas iti blue wenno red notice kontra kadagiti akusado.
Blue notice nu maipapan iti panangipaay ti Pilipinas iti lokasyon ti akusado bayat a red notice met kas pammalubos nga arestarenda dagitoy.
Iti agdama, Immigration Lookout Bulletin Order paylaeng ti impaiyulog ti nasao nga opisina kontra kadagiti indibidwal nga adda ti pakainaiganna kadagiti naanomalyaan a flood control projects.
