BAGUIO CITY – Agpatpataming ita iti pagagasan ti maysa a driver kalpasan a nadangran idi natumba ti imanmanehona a vegetable truck sadiay Badiwan, Poblacion, Tuba, Benguet idi kalman.
Nabigbig daytoy a ni Jerafil Tacio, 26-anyos, naasawaan, tubo ti Buguias, Benguet ken residente ti Central Balili, La Trinidad, Benguet.
Maibasar iti imbetigasyon dagiti pulis, pasalog iti Marcos Highway ni Tacio ken idi asidegen iti Badiwan Viaduct sa Marcos Highway ket nasabatna ti maysa a dropside truck a manarimaan nga agkillo iti kalsada pasang-at iti Baguio City.
Linisyan ni Tacio ti nagkillo a truck ngem gapu iti kadagsen ti karga ti imanmanehona a trak ket naawanan daytoy iti kontrol a nangitunda iti panakatumba ti lugan iti igid ti kalsada.
Dagus a naispal ni Tacio ken naitaray iti pagagasan babaen kadagiti nagresponde a personnel ti Tuba Municipal DRRM Office ken Bureau of Fire Protection – Tuba.
Nagresulta pay ti insidente iti panakadadael ti sangwanan a paset ti vegetable truck gapu iti kapigsa ti panakatumba daytoy.
