BAGUIO CITY – Naibaluden ti driver ti jeep a nakadungoar iti maysa a baro iti sangwanan ti maysa a balay paginuman sadiay M. Roxas Street, Trancoville, Baguio City.
Pimmusay ti nasao a baro kalpasan nga aksidente a nadungpar daytoy ti jeep iti nasao a lugar idi napalabas a lawas.
Nabigbig ti biktima a ni Bryan Joshua Banite, 22-anyos, transcriptionist ken residente ti Pico, La Trinidad, Benguet.
Nabigbig met ti driver ti jeep a ni Marlo Dao-ania, 33-anyos, naasawaan, mannalon ken residente ti Loacan, Itogon, Benguet.
Naduktalan iti imbestigasyon ti pulisya a naaddaan iti saan a panagkinnaawatan ti biktima ken ti kadwa daytoy a nabigbig a ni Jerico Borbe a nagresulta iti panakatumba ti biktima iti kalsada.
Kalpasanna ket aksidente a nadalapus daytoy ti nasao a jeep.
Naitaray pay ti pagagasan ti biktima ngem gapu iti kakaro ti dunor a nasagrapna ket saanen a nakalasat.
