BAGUIO CITY – Padasen ti lokal a gobierno ti Mankayan, Benguet nga ipatungpal ti total lockdown iti masakupan ti munisipio.
Iti interbyu ti Bombo Radyo Baguio kenni Mayor Frenzel Ayong, kinunana a maipatungpal ti dry run ti total lockdown inton Lunes, Marso 23, partikular iti alas 12:01 ti parbangon ken agleppas inton Marso 24.
Inlawlagna a maipatungpal ti dry run tapno maipasagepsep iti panunot dagiti umili ti kinaseryoso ti sitwasyon a resulta ti COVID-19.
Kinunana a masapul ti dry run tapno makita no ania dagiti masapul a maaramid no naan-anay a maipatungpal ti lockdown sadiay Mankayan.
Mainaig iti daytoy ket dinakamat ti mayor nga iti agdama ket addan ti pito a persons under investigation (PUIs) ken 15 a persons under monitoring (PUMs) sadiay Mankayan.
Kiniddaw ni Ayong ti kooperasion dagiti umili tapno masolbar ti parikot iti COVID 19.
