Nagballaag ti Department of Social Welfare and Development (DSWD) kadagiti benepisiario a saanda nga i-sugal dagiti maaw-awatda a cash aid.
Maibasar iti memorandum a nairuar idi Lunes, Agosto 18, imbilin ni DSWD Secretary Rex Gatchalian kadagiti amin a mangipatpatungpal iti programa a palagipanda dagiti benepisiario nga usarenda kadagiti kangrunaan a pagkasapulan dagiti kuarta a maaw-awatda.
Imbilin metlaeng ni Gatchalian ti nainget a monitoring kalpasan a maipaay dagiti ayuda.
Karaman metlaeng ti dagos nga aksyon kadagiti reklamo seknan iti saan nga umno a panagaramat kadagiti kuarta.
Siasino man a matiliwan a nangisugal iti ayuda, posible a maikkat iti programa ken saanen a maikari nga umawat iti tulong manipud iti gobierno.
Kabayatanna, idagdagadag ti DSWD kadagiti amin a benepisiario nga aramatenda iti umno dagiti tulong manipud iti gobieno para, iti pagsayaatan ti pamilya dagitoy.
