BAGUIO CITY – Natiliw ti dua a drug personalities a nakalista a High Value Individuals dagiti otoridad iti nagsina a buy-bust operation sadiay Benguet itay laeng nabiit.
Natiliw iti operasyon sadiay Betag, La Trinidad ni Victor Lara Bugawan, 50-anyos kalpasan nga inlakona iti operatiba ti maysa a pakete ti maatap a shabu nga agdagsen ti 0.25 gram.
Nakumpiskar pay kenkuana ti kanayonan a maysa a pakete ti maatap a shabu nga agdagsen ti 0.18 gram bayat a nakober ti metlaeng manipud kenkuana ti naaramat a buy-bust money.
Natiliw met iti kapada nga operasyon sadiay Upper Poblacion, Tuba ni Rey Barrozo Marquez, 32-anyos kalpasan nga inlakona iti operatiba ti maysa a pakete ti maatap a shabu nga agdagsen ti 3 grams ken aggatad ti nasurok P20,000.
Narekober manipud kenkuana ti naaramat a buy-bust money ken nakumpiskar ti cellphone ken motorsiklo nga inaramatna iti transaksion.
Sumangsango metten dagiti dua iti kaso a panaglabsing iti RA 9165 wenno ti Comprehensive Dangerous Drugs Act of 2002.
