BAGUIO CITY – Imbinglay ti dua a kailian ditoy rehion Cordillera nga agnanaed ita sadiay Israel ken Cambodia ti sitwasion dagitoy kagiddan ti pandemya nga ituntunda ti COVID19 infections.
Iti zoom interview ti Bombo Radyo kada Geoffrey Olayan sadiay Israel ken Ana Mae Sabelo iti Cambodia; agpada a binigbigda ti napintas a plano ken addang ti gobierno dagitoy seknan iti panagrespondeda iti agdama a krisis ti salun-at.
Kinuna ni Sabelo a maysa a mannursuro sadiay Cambodia a mandatory itan ti panagpabakuna dagiti residente sadiay no sadino dagiti bakuna a Sinopharm ken Astrazeneca ti maipapaay kadakuada
Dinakamatna nga iti baet a manaynayonan iti inaldaw ti kaso a mailislista sadiay ket agtultuloy latta ti panagpabakuna dagitoy nangruna ta maikonsidera a frontliners dagiti mannursuro sadiay Cambodia.
Innayona nga agingga iti agdama ket nakarikep kadagiti turista dagiti pagpasyaran sadiay kas panagliklik dagitoy iti ad-adda pay a panagwaras ti COVID-19 virus.
Kabayatana, impannakel ni Olayan ti napintas a wagas ti gobyerno ti Israel tapno maliklikan ti panagwaras ti virus sadiay.
Kinunana nga epektibo ti vaccination plan ken program ti gobyerno no sadino dandani amin a Pilipino dagiti nabakunanaanen iti Pfizer Bio N Tech a nakatutukan ti Israel.
Dinakamatna a maysa dagiti Pilipino a prioridad a mabakunaan gaputta kaaduan kadagitoy ti caregiver a maibilbilang a frontliners.
Imbinglayna pay a ti rason ti saandan a panagaramat iti facemask ket gapu iti kinatulnog ti publiko malaksid pay iti komprehensibo a panangimaton ti gobierno.
Sigun pay kenni Olayan, awanen ti mailislista ti health deparment sadiay a Pilipino nga agpospositibo iti COVID19 malaksid pay a bumabbaba iti 200 ti kaso dagitoy iti virus tunggal aldaw.
Mangipakita met daytoy iti nangatngato a kaso ti panagimbag no idilig kadagiti aktibo a kaso.
Agtalek dagiti dua a Filipino workers nga adaptaren ti Pilipinas ti wagas kangrunaan ti Israel tapno dumteng metten ti panawen a saanen a kasapulan nga agaramat pay iti facemask ti publiko.
Mainaig iti dayta, agtultuloy ti repatraiation a programa ti nasional a gobierno ti Pilipinas para kadagiti OFW nga agkasapulan iti daytoy.
