BAGUIO CITY – Nailukat ti dua a kanayonan a ruta para iti 24/7 free ride para kadagiti Authorized Persons Outside Residence (APORs) iti rehion Cordillera iti sidong ti Service Contracting Program ti Land Transportation Franchising and Regulatory Board (LTFRB).
Sakupen ti maikadua a ruta ti AMBAYAO – PUROK 12 – LA CHESA and vice versa ken sakupen met ti maikatlo a ruta ti BAGUIO CITY PLAZA – CRYSTAL CAVE and vice versa.
Immuna metten a nailukat ti umuna a ruta para kadagiti APOR a nangsakop iti BAGUIO CITY PLAZA – DALUPIRIP sadiay Itogon, Benguet.
Al-allukuyen ti LTFRB-Cordillera dagiti APORs kadagiti nasao a ruta iti panagnuymarda iti nasao a serbisyo.
Kagiddan iti daytoy, inyunay-unay ti ahensia a saanda nga agaw-awat ti aniaman a bayad tapnu laeng mainayon ti maysa a driver wenno operator iti Service Contracting Program.
Kinuna ti LTFRB-Cordillera a saan a kasapulan ti aniaman a bayad kabayatan ti aplikasyon ken panangisumitir kadagiti dokumento para iti Special Permits ken Free Rides para kadagiti APORs, front liners ken health care workers.
Kidkiddawenda pay ti panangireport kadakuada iti asinoman nga indibidual, kooperatiba wenno korporasyon nga agsingsingir wenno agkidkiddaw ti bayad tapnu laeng mainayon ti maseknan iti aniaman a programa ti LTFRB.
