--Ads--
BAGUIO CITY – Agtultuloy ti imbestigasyon dagiti otoridad iti rason ti panakauram ti dua a pagtaengan sadiay Kayang, Poblacion, Buguias, Benguet a nakatayan ti maysa a senior citizen idi rabii.
Maibasar iti report, napasamak ti uram iti agarup alas-nuebe idi rabii ken nangrugi daytoy iti bungalow house ti biktima a ni Irenio Manman Sacpa, 74-anyos, mannalon.
Kimmayamkam ti apoy ket nairaman ti bungalow house ni Renson Sacpa, 37-anyos, mannalon.
Sigun kadagiti otoridad, saan a nabaelan ti senior citizen a makaruar iti pagtaenganna a rason iti panakauram daytoy.
Mapattapatta met nga agarup nasurok P430,000 ti danyos dagiti nauram a balay.
