Kinumpirmar ni Cristopher Abanag, Punong Barangay ti Barangay Catlubong idiay Buguias a dua a truck ti nagaburan iti nasao a barangay gapu pay laeng iti agtultuloy a panagbayakabak iti tudo.
Iti pannakiuman ti Bombo Radyo kenkuana, ginaburan ti retaining wall dagiti dua a truck ti nateng a nakaparada iti nasao a lugar. Sigun kenni Abanag, nairanta talaga a pagparadaan ti nasao nga espasyo ngem gapu iti agtultuloy a panagtudtudona ket kaawan ti umdas a rumwaran ti danum iti ngato ti nasao a pasdek, linmukay ti daga ket ditoy metten a bimmigay ti nasao a retaining wall.
Nupay kasta, impettengna nga awan met ti nadangran nga indibidual iti napasamak a pannakagabur dagiti lugan.
Innayonna nga iti agdama, agkidkiddaw dagiti makinkukua iti lugan ti tulong iti publiko para iti pannakatarimaan dagiti luganda.
Sigun kenni Punong Barangay Abanag, dagiti nasao a truck ket maararamat nga aghakot kadagiti natnateng a maiturturong kadagiti paglakuan.
Kabayatanna, imbinglay ni Abanag nga iti agdama, daytoy pay laeng ti nairekord da a landslide iti nasao a barangay. Awan metlaeng dagiti nairekord da a nagbakwit a pappamilya.
Iti baet dayta, kinuna ti nasao nga opisyal a nakamonitorda kadua dagiti tanod, barangay health workers, ken kameng ti Barangay Disaster Risk and Reduction and Management tapno kitaenda dagiti posible nga epekto ti saan a nasayaat a sasaaden ti panawen. //bombokaren.c.sapirao
