BAGUIO CITY – Natiliw ti maika-lima a top most wanted person iti Cordillera Region kalpasan nga inserbi dagiti otoridad ti warrant of arrest daytoy sadiay San Luis Village, Baguio City itay nabiit.
Ti nasao nga indibidual ket 58-anyos ken residente ti Antipolo City.
Sumangsango daytoy iti kaso a 13 a bilang ti incest rape nga awanan ti nairekomendar a piansa, no sadino, biktimana ti anakna a babai.
Maibasar iti report, napasamak ti panagrames ti suspek iti anakna idi 2015 ditoy siudad ti Baguio.
Naamuan a gapu iti daytoy ket nasikogan ti biktima isu’t gapuna a nagawid iti probinsiada ngem kalpasan a naregreg ti sikogna ket nagsubli manen ditoy siudad.
Naulit manen ti panangrames ti suspek iti anakna isut gapuna a nagipilan ti kaso ti biktima.
Kabayatanna, natiliw metlaeng ti maika-lima a top most wanted person iti Benguet kalpasan nga inserbida ti warrant of arrest daytoy sadiay Poblacion, Buguias, Benguet.
Ti nasao nga indibidual ket 41-anyos, mannalon ken residente ti Buguias, Benguet a sumangsango kadagiti kaso a dua a bilang ti statutory rape ken acts of lasciviousness.
Naipaima metten dagiti dua nga indibidual iti maseknan a korte sakbay ti panakaipisok dagitoy iti pagbaludan.
