Kinemmeg dagiti otoridad ti lima a Chinese nationals ken maysa a Pilipino a maatap nga adda pakainaiganda iti insidente a napasamak idiay Metro Manila nu sadinno, dua a Chinese nationals ti biktima.
Dagiti biktima ket napalpaltugan gapu iti saan a nabayadana a loan.
Maimatangan iti CCTV footage idi Hunyo 15 nga uppat a lalaki ti simrek iti condominium unit iti Roxas Boulevard idiay Parañaque City.
Kalpasan daytoy, rimwar ti innem a lallaki iti nasao a unit.
Sigun kadagiti otoridad, dua a lallaki nga agkabsat ti napalpaltugan iti condominium unit kalpasan a rimwar ti lallaki.
Naduktalan dagiti pulis ti dua a biktima iti datar a dara-dara gapu iti panangpalpaltog iti baba a paset ti bagida.
Dagos a naiturong dagiti biktima iti pag-agasan ken nasayaaten ti kondisionda.
Iti panagimbestigar dagiti pulisia, sangapulo ti suspek nga adda pakainaiganna iti panangpaltog — dua a Pilipino ken walo a Chinese nationals.
Maysa a Pilipino ti maatap a nagserbi kas “bodyguard” iti grupo ket naarestar iti pagtaenganna idiay Parañaque City nu sadinno, daytoy ket sigud a nakemmeg gapu iti kaso a “carnapping” ken “robbery”.
Kabayatanna, ti dua a Chinese nationals ket nakemmeg iti hotel room idiay Pasay City.
Idiay met Clark, Pampanga nakemmeg met ti maysa a Chinese national.
Immuna metten a kinemmeg dagiti otoridad ti maysa a Chinese nationals gapu iti kaso daytoy a coercion.
Mapapati a nakabulod dagiti biktima iti kuarta manipud iti grupo dagiti Tsino a nangipabulod iti kuarta kadagiti casino players.
Iti agdama, manarimaan ti manhunt operation kadagiti suspek nga uppat a Chinese national pakairamanan ti mapapati a “big boss”.
Im-imbestigaran metlaeng ti Presidential Anti-Organized Crime Commission (PAOCC) ti insidente tapno makita nu adda pakainaganda iti iligal a POGO.
