Saan nga ikonkonekta ti Department of the Interior and Local Government (DILG) iti maysa a drug syndicate idiay Davao ti nakumpiska nga agarup P3.5 B a maatap a shabu idiay Laos.
Sigun kenni Interior Secretary Jonvic Remulla, nakapokus ti imbestigasyonda ita iti panangbigbig kadagiti indibidual a posible a karaman iti nasao a krimen.
Kabayatanna, binigbig dagiti otoridad ni sigud a Bangsamoro parliament member Edrieza Hadji Nasser Rimbang kas suspek a mapagduaduaan a nangpundo iti panangi-arrange iti pribado nga eroplano a mangitulod kuma iti nasao a druga manipud Laos agingga iti Manila.
Nupay kasta, impetteng ti opisyal a saanda nga ikikaten ti posibilidad nga adda pay dagiti dadduma a personalidad a karaman iti nasao nga insidente.
Inlawlawag met ni Remulla nga awan ti natibker a pammaneknek a karaman ni sigud a President Rodrigo Duterte iti nasao nga smuggling operation.
Agtultuloy pay laeng ti panangbigbig ti Philippine National Police ken Philippine Drug Enforcement Agency kadagiti tattao a posible a karaman iti transaksyon bayat a maururay met dagiti laboratory results manipud Lao tapno makumpirmar ti nakumpiska a maatap a shabu.
