Inwaragawag ni DILG Secretary Jonvic Remulla nga agkiddaw dagitoy iti kanayunan nga interbensyon manipud iti Supreme Court ken Kongreso tapno adadda a mapapigsa dagiti addang kontra kadagit insidente ti pammaltog kadagiti pagadalan.
Kasaruno daytoy iti napasamak a shooting incident idiay Banga National High School idiaySouth Cotabato.
Sigun kenni DILG Secretary Jonvic Remulla, kayatna a palubosan ti Korte Suprema ti Philippine National Police (PNP) a mangipatungpal iti inspeksyon kadagiti pagtaengan dagiti kwalipikado nga agtagikua iti paltog tapno masigurado ti umno a panangidulinda kadagiti armas dagitoy.
Impetteng metlaeng ni Remulla nga iti tallo nga insidente ti school shooting ita a tawen, dagiti naaramat a paltog ket kukua dagiti empleyado ti government officers isu’t gapunna a rumbeng a maaddaan iti direkta a responsibilidad dagiti gun owners seknan iti panangidulin kadagiti armas da.
Kagidan dayta, nakikoordinar metten ti DILG iti Department of Justice (DOJ) para iti pannakaipila ti petisyon iti Korte Suprema bayat a kidkiddawenda ti pannaka-amyendar ti linteg seknan iti gun ownership ken liability dagitoy.
Malaksid kadagiti paltog, kayat metlaeng ni Remulla a maikan iti atensyon ti impluwensya ti social media ken online communities kas iti “true crime” groups kadagiti agtutubo a posible a mangimpluwensya kadakuada a mangaramid iti kinaranggas.
Naituding met a maaddaan iti meeting ti DILG ken Department of Information and Communications Technology (DICT) nu sadino posible nga agkiddawda iti aksyon manipud iti Kongreso para iti nadagdagsen a pannangsalwad kadagiti ubbing ken agtutubo iti online pakairamanan ti pananglimita iti social media access para kadagiti menor de edad.
