BAGUIO CITY – Sinukimat dagiti otoridad ti dua nga establisiemento sadiay Mabini Street, Baguio a nagresulta tapno maduktalan ti panaglabsing dagitoy iti linteg.
Sigun ken ni Daryll Longid, deputy chief ti Public Order and Safety Division (POSD), puntirya ti inspeksion ti maysa a billiard hall a naiparikep idi Enero 24.
Nupay kasta, kinunana a naduktalan a nagala ti agtagikua iti billiard hall iti baro a permit babaen iti sabali a nagan a nagresulta iti pannakaduktal iti kanayonan a panaglabsing ti pasdek.
Kinunana nga iti kabarbaro nga inspeksion ket naduktalan nga agsigsigarilio ti agbambantay iti billiard hall ken aglaklakoda iti sigarilio.
Kabayatanna, sinukimat pay dagiti otoridad ti maysa a darts and resto bar ken naduktalan ti panagilako dagitoy iti sigarilio uray awananda iti permiso.
Sigun ken ni Longid, apaman nga aglabsing manen ti maikadua nga estbalisiemento ket maiparikepen daytoy.
