BAGUIO CITY – Nakemmeg ti dua indibidual iti operasyon nga insayangkat dagiti otoridad sadiay Mamaga, Bugnay, Tinglayan, Kalinga idi Martes, May 19.
Nabigbig dagiti suspek a da Rich Vandamme Armoreda y Alegre, 25-anyos, shoe vendor ken ni Martin Lorenzo Serrano, 22-anyos, awanan asawa ken agpada a residente ti Caloocan City.
Maibasar iti report, nangisayangkat dagiti otoridad ti inspection iti maysa a lugan a nakaparada iti nadakamat a lugar.
Kabayatan ti panagsukimatda kadagiti suspek ket nakitada ti maysa a tubular form a nabalkot ti transparent plastic a naglaon ti maatap a napagango a marijuana.
Nakumpiskar metlaeng manipod kadagiti suspek ti 4 a sako ti maatap a marijuana nga agdagsen ti 36kg nga aggatad ti P4.3M, dua a cellphone ken dagiti dadduma pay a drug paraphernalia.
Kabayatanna, nakemmeg ti innem nga indibidual iti nagsisina nga operasyon nga insayangkat dagiti otoridad iti 3 a probinsia ti Cordillera.
Sigun kadagiti otoridad, nangilako dagitoy ti maatap a shabu kadagiti police officers a nagpamarang kas poseur buyer.
Iti agdama, sumangsangon dagitoy iti kaso a panaglabsing iti RA 9165 wenno Comprehensive Dangerous Drugs Act of 2002.
