Impetteng ti sumagmamano a kongresista ken maysa nga abogado a natibker ti ebidensia a naala iti napagmaymaysa nga impeachment complaints kontra kenni Vice President Sara Duterte, ken umno tapno maala ti kasapulan a botos iti plenario tapno maipaay iti Senado.
Sigun kenni Rep. Gerville Luistro, chair iti House Committee on Justice, ti maisaysayngkat a panagdengngeg ket nakabasar iti “evidence-based process” ken saan nga iti opinion.
Innayonna pay a saan nga isyu iti politikal ti nasao a banag nu diket iti Konstitusion ken public accountability, ken naituding nga agtuloy ti komite para iti panagaprobar iti committee report.
Kabayatanna, sigun iti abogado a ni Lorna Kapunan, posible a dumanon iti pluner case dagiti ebidensia, karaman ti report iti Anti-Money Laundering Council (AMLC) a “nag-flag” iti ₱6.7 bilyon a “suspicious transactions” kadagiti bank accounts a mainaig iti pamilia Duterte ken ti asawa daytoy a ni Atty. Mans Carpio.
Impaganetget pay ni Kapunan a ti nasao a gatad ket mabalin pay a dakdakkel gaputa limitado laeng ti makitkita iti AMLC kadagiti transaksion.
Iti benneg met iti House leadership, kinarit ni Davao City Rep. Paolo Duterte a sumango iti plenario ken idepensa ti kabsatna seknan kadagiti alegasion a panagbutbuteng kadagiti kongresista tapno suportaran ti impeachment.
Iti panagbotos iti House Justice Committee, nagkaykaysa nga inaprobaran iti 53 a kameng nga addaan iti probable cause ti kaso ken nairaman ti dua a reklamo.
Manamnama nga iti maikadua a lawas iti Mayo ket matalantan iti plenario ti impeachment nu sadinno kasapulan ti saan a bummaba iti 106 a botos dagiti kongresista tapno maipasa daytoy iti Senado nga agserbi nga impeachment court.
Impasigurado met iti Senado a dagos daytoy nga agtipon kas impeachment court iti kanito a maipasa ti kaso, uray pay break ti session inton Hunio 5.
Karaman kadagiti pammabasol kontra kenni VP Sara Duterte ket ti mapapati a saan nga umno a panagaramat iti confidential funds, saan a mailawlawag a kinabaknang, ken alegasion iti panggep a panangpatay kenni PBBM—alegasion a pinaglibakanna.
