Isaksakad ti Association of barangay councils of Aurora hill, City Environment and Parks Management Office ken ti opisina ni councilor Lourdes Tabanda ti eco-friendly practices babaen iti panakaisayangkat ti “Bayanihan CommuniFair”.
Ti “Bayanihan CommuniFair” ket maipatungpal tunggal aldaw ti Sabado ken Domingo iti binulan sadiay Bayan Community Park idiay Bayan Park Village, Aurora Hill.
Pasetan daytoy dagiti sangapulo ket uppat a Barangay kas iti Bayan Park Village, East Bayan Park, West Bayan Park, South Central Aurora Hill, Honeymoon, North Central Aurora Hill, Brookside, Brookspoint, Ambiong, Lopez Jaena, San Antonio Village, Aurora Hill Proper, East Modern Site ken West Modern Site.
Iti panakiuman iti Bombo Radyo kenni councilor Lourdes Tabanda itay nabiit, kinunana a dry run paylaeng wenno testing paylaeng daytoy nu effective.
Impeksa pay ni Tabanda a dagiti palubusanda a mailako iti Bayan Community Park ket dagiti own made dagitoy wenno gawa sa kamay.
Malaksid iti dayta, rumbeng a dagiti packaging a maaramat para kadagiti produkto dagitoy ket newspaper, papel ken daduma pay malaksid iti plastics.
Inaklon met ti councilor nga ita a gundaway ket agrugrugida ngem ikarigatanda a pasayaaten daytoy inton sumarunu nga schedule ti fair.
Innayun pay ni Tabanda a babaen iti daytoy nga aktibidad ket maamuan nu kasanu a maksayan ti basura.
Inlawlawag ni Tabanda a dagiti participants ti Fair ket rumbeng a minimal ti basura dagitoy.
Kas kuma iti panangitandududa iti panagaramat iti tumbler imbes a paper cup.
Imbinglay ni Tabanda a mayat ti panakamuntar ti fair sadiay gaputa maiparit ti agluto isut gapuna nga adda iti paggatangan ti makan dagiti parkgoers.
Malaksid iti dayta, impeksa ti councilor a maysa metlaeng daytoy a wagas tapnu maitandudu ti bukud a produkto.
Impaganetget met ni Tabanda nga awan ti dadduma a trade fair a makauneg sadiay.
Iti sabali a bangir, maragsakan met dagiti barangay captain iti naipaay a gundaway para kadakuada tapnu maitandudu ti produkto ken maaddaanda iti kanayunan nga income.//Bombo Noveh
