BAGUIO CITY -Nakasagana ti probinsia ti Benguet ita a panagtutudo.
Daytoy ket kalpasan nga imbilin ni Governor Melchor Diclas kadagiti nagduduma a mayor ti pananglinis dagitoy kadagiti kanal iti masakupanda a lugar tapnu maliklikan ti panagbarado a mabalin a mangitunda ti layos nanagruna kadagiti kadawyan a malaylayos a lugar.
Sigun kenkuana, naiwaras dagiti nagduduma a heavy equipment ti Provincial Disaster Risk Reduction and Management Office (PDRRMO) kadagiti lugar a kangrunaan a maap -apektaran ti panagtutudo kas sadiay depaar ti Buyacaoan, Buguias, Benguet.
Nakikoordinar metten dagitoy kadagiti opisyales ti DPWH tapnu bantayanda dagiti kalkalasada nga asideg kadagiti proyekto ken patrabaho ti ahensia, nangruna dagiti kalsada a kadawyan a pakaregreggaayan ti daga.
Innayonna a nangilatangda ti pondo nga itulongda kadagiti munisipyo iti probinsia nga agpangpanggep a gumatang ti heavy equipment nga aramatenda iti panawen ti kalamidad kas iti bakhoe, loader ken daduma pay.
Naamuan nga agtultuloy ti panangibaon ti gobernador kadagiti personnel ti Provincial DRRM Office tapnu mangisayangkatda ti emergency clearing operations kadagiti farm-to-market roads iti nagduduma a lugar iti probinsia tapnu maipasigurado ti natalged a panagbiahe dagiti mannalon, nangruna ita a panagtutudo.
Itay laeng nabiit ket naisayangkat ti dua nga aldaw a panagdalus iti nagduduma a paset ti 4.2-kilometer iti Indawak-Andolor Farm-To-Market Road sadiay Tabaan Sur, Tuba, Benguet.
