BAGUIO CITY – Maob-obserbaran ti pulisya ti epekto ti agsasaruno nga eradication operation dagitoy iti panagmula ti marijuana sadiay Kalinga.
Iti panakiuman ti Bombo Radyo Baguio, imbinglay ni PCol. Davy Vicente Limmong, dadaulo ti Kalinga Police Provincial Office a nadlawda nga umad-adayo metten dagiti lokasyon dagiti madisdiskobreda a pagmulaan ti marijuana.
Kinunana a gapu iti daytoy ket marigatanda metten a makabiruk kadagiti plantation sites dagiti marijuana nangruna kadagiti nailemmeg a luglugar iti kabambantayan ti Kalinga, nangruna sadiay Tinglayan.
Innayonna a nainget met ti koordinasyonda iti PDEA, dadduma nga yunit ti pulisya ken kadagiti barangay officials para iti kampanya kontra iti iligal a droga.
Nupay kasta, inaklonna nga adda latta dagiti umili sadiay a natengken ti uloda nga agmula ti marijuana.
Sigun kenni Col. Limmong, daytoy ket gaputa adda latta dagiti gumatang ti marijuana.
Impettengna a no makontrol wenno maawan ti demand wenno dagiti gumatgatang kadagiti marijuana ket dakkel ti posibilidad a maksayan wenno sumardengen ti panagmula ti marijuana sadiay Kalinga.
