BAGUIO CITY – Marikrikna ken marigrigatan latta dagiti sastre wenno modista sadiay Maharlika Livelihood Complex ditoy siudad ti Baguio iti epekto ti agdama a pandemya.
Iti panakiyuman ti Bombo Radyo Baguio iti sumagmamano kadagitoy, naibingayda a dagiti laengen sukida ti agturturong iti pwestoda tapnu agpadait.
Kinunada a dakkel ti pukaw wenno lugi iti mapaspastrekanda ita nga adu nga aktibidad ti nakanselar kas iti face-to-face classes dagiti estudyante.
Inlawlawag ni Letty Castillo, maysa a modista iti nasao a pasdek a daytoy ket gaputa kaaduan a kostumerda sakbay ti pandemya ket dagiti agpapadait ti uniporme, nangruna dagiti estudyante.
Imbinglayna nga iti agdama ket uppat agingga lima laengen ti kustomerda iti innaldaw nga adayo iti sigud a kaadu ti agbalbalin a kliyenteda iti innaldaw sakbay ti pandemya.
Innayonna a saan pay nga umanay ti mapaspastrekanda a pangpalengke nangruna ta makibingay pay ti boss dagitoy.
Naamuan a lima gasut a pisos agingga innem a gasut a pisos ti kadawyan a mapaspastrekanda iti innaldaw sakbay ti pandemya ngem ita ket kagudwa laengen ti nasao a gatad ti mapaspastrekan dagitoy.
