Inwaragawag ti Estados Unidos ken pagilian a Pilipinas ti pannakabukel ti “task force” a manglapped iti biolente nga aksion kadagiti taaw a masakupan ti pagilian a Pilipinas.
Sigun kenni US Secretary of War Pete Hegseth, nakasagana dagitoy a mangdipensa ken mangprotektar iti teretorio ti Pilipinas ken dagiti bukodda nga interest, isu’t gapuna nga inwaragawagda ti pannakabukel ti “Task Force Philippines.”
Babaen iti nagtipon a pwersa ti pagilian ken Estadus Unidos, ad-adda a maaramid ti panagtitinnulong, ken panagsagana a mangsungbat iti krisis, aggression ken dadduma pay.
Kabayatanna, pinasingkedan manen da Defense Secretary Gilberto Teodoro Jr. ken Singapore Defense Minister Chan Chun Sing ti natibker a singgalut ti Pilipinas ken Singapore.
Daytoy ket babaen iti napagsaritaan dagitoy nga agtultuloy ti inisiatiba ti dua a pagilian, tapno ad-adda a mapapigsa ti panagtitinnulong ti depensa ti Pilipinas ken Singapore.
