BAGUIO CITY – Malamlamayan ita ti maysa nga estudyante a pimmusay kalpasan a dinungpar ti elf nga addaan iti plaka a TEG-133 sadiay Cotcot, Bangao, Buguias, Benguet idi malem kalman.
Nabigbig ti biktima a ni Denver Martes Patpat, agtawen iti duapulo, ken residente ti Dalicno, Ampucao, Itogon, Benguet bayat a ti driver ti elf ket nabigbig a ni Rodel Lagadan Polido, 20, ken residente ti Cadad-anan, Tadian, Mt, Province.
Maibasar iti imbestigasyon ti pulisya, nagtaud ti biktima ken ti pamilyana manipud iti family reunion dagitoy sadiay Guinzadan, Bauko, Mt. Province ken nagsardengda sadiay Cotcot, Bangao, Buguias.
Manarimaan ti panang-picture ti biktima iti kabsatna iti sango ti view deck idi naaddaan met iti mechanical defect ti elf nga imanmaneho ni Polido ket nagdiretso agingga a dinungparna ti biktima.
Naitaray ti biktima iti Lutheran Hospital sadiay Abatan, Buguias ngem naideklara a dead on arrival.
Kabayatanna, timmaray met ti driver iti asideg a garden ken ginandatna ti agpakamatay babaen iti pananginomna iti battery solutions a nakitana iti uneg ti kalapaw sadiay.
Nakita daytoy dagiti maseknan a residente ken intarayda daytoy iti nasao met laeng nga ospital.
Naiyawiden ti bangkay ti biktima iti balay dagitoy bayat a maisagsagana ti kaskenan a kaso a maidatag kontra iti nasao a driver.
