Maisublin ti excise tax iti liquefied petroleum gas (LPG) ken kerosena kalpasan iti temporaryo panangisuspend ti gobyerno iti panangipataw ti buwis kadagiti nadakamat a produkto.
Sigun iti Bureau of Internal Revenue (BIR), nangrugi daytoyen iti kalman, Hulyo 8 .
Naisubli ti buwis dagitoy kalpasan iti panagbaba ti produkto a petrolyo iti national market.
Dinakamat metlaeng ti BIR a sigun iti Department of Energy (DOE), dumanon laengen ti 79.45 dollars tunggal bariles ti average a presyo ti Dubai crude oil manipud Hunyo 1 agingga Hunyo 30.
Gapu ta binmaba daytoy iti 80 dollars tunggal bariles, otomatiko metten nga agsubli ti excise tax ti LPG ken kerosena.
Maipalagip a temporaryo a naikat ti tax idi Abril gapu iti panagbaliw iti presyo ti produkto a petrolyo gapu iti tensyon idiay Middle East. //bombokaren.c.sapirao
