BAGUIO CITY – Maipatpatungpalen ti face-to-face but no contact visitation iti dua a pagbaludan ditoy rehion Cordillera.
Sigun kenni Jail Inspector Erlinda Las-egan, panakangiwat ti Bureau of Jail Management and Penology (BJMP)-Cordillera, dagitoy ket ti La Trinidad District Jail-Female Dormitory ken ti Bucay District Jail sadiay Abra.
Kinunana a napili dagitoy a pakaipatungpalan ti nasao a sistema ti panagbisita kalpasan a nakapasada iti naisayangkat nga inspeksion.
Maipalagip a maysa ti Cordillera kadagiti napili a pakaisayangkaran ti non-contact visitation kadagiti pagbaludan.
Sigun kenni Las-egan, nangrugi ti panagbisita iti Female Dorm ti La Trinidad District Jail idi December 1 iti ala una agingga alas kwartro ti malem ken 15 a cubicle ti naimuntar para iti maysa oras a panagsango ti balud ken bisita daytoy.
Nangrugi met ti panagbisita iti Bucay District Jail idi December 5 iti ala una agingga alas kwatro ti malem ken 24 a cubicle ti naimuntar para iti maysa nga oras a panagsango ti balud ken bisita daytoy.
Maur-uray metten ti panangaprobar ti BJMP-Cordillera iti panakaipatungpal ti face-to-face but no contact visitation iti Male Dorm ken Female Dorm ti Baguio City Jail, iti Buguias District Jail, Tabuk City Jail, Alfonso Lista District Jail ken Luna District Jail.
Impetteng ni Las-egan a kasapulanen nga ilukat dagiti pagbaludan kadagiti bisita tapno makita metten dagiti balud dagiti kabagian ken dadduma a bisita dagitoy.
Maikalkalikagum met a dagiti agbisita ket agiparang ti vaccination card, ID ken agpirmada ti health declaration form malaksid pay iti panakaipasidongda iti triage dagiti pagbaludan.
