Manamnama nga agleppas iti maikasiam a pwesto dagiti Fearleass Highlanders iti 2025 Palarong Pambansa.
Maibasar iti kaudian a medal tally, dumanonen iti 17 a gold medals ti nagun-od ti delegasyon a kangrunaan a nagtaud kadagiti combat sports kas iti Taekwondo, Wushu, Wrestling, kasta metten iti Archery.
Pakabuklan a 41 ti nagun-od a medalya iti nasao a delegasyon a buklen iti nadakamat a bilang iti gold medal, 13 a silver ken 11 a bronze.
Iti panakiuman iti Bombo Radyo kenni Edgar Madlaing, ti Regional Sports Coordinator iti Department of Education-Cordillera, adda iti nasurok 100 nga atleta manipod Cordillera ti makipartisipar iti closing ceremony iti nasao a pasalip a maangay ita nga aldaw.
Sigun kenni Madlaing, naiyakar ti pakaangayan ti closing ceremony iti closed venue kagiddan ti panagrugi iti panakapasar iti tudo idiay Ilocos Norte.
Kabayatanna, immuna metten a nakaawid kadagiti luglugarda iti rehion Cordillera dagiti daduma nga atleta kalpasan ti ay-ayam dagitoy.
Sigun kenni Madlaing, adda dagiti nagannak a nangsukon kadagiti annakda kasaruno ti umno a panangipakadada kadagiti coaches dagitoy.//Bombo Rob Dominguez
