BAGUIO CITY – Ipatungpal ita nga aldaw ti Baguio City Police Office (BCPO), Bureau of Fire Protection, Armed Forces of the Philippines ken ti Tactical Operations Group 1 ti pinal a “walk through” kadagiti lugar a pagturungan dagiti kandidata ti Miss Universe ditoy siudad.
Sigun kenni PSSupt. Ramil Saculles, Acting City Director ti Baguio City Police Office, ipatungpalda ita nga aldaw ti maikadua ken pinal a “walk through” ken “simulation exercises” a maitunos iti maipatungpal a security plan.
Malaksid iti daytoy, mangipatungpal met iti inspeksyon ti Explosive Ordnance Division ken ti K-9 Unit ti pulisya tapnu maipanamanama a natalged dagiti lugar a pagnaan dagiti kandidata.
Kabayatanna, idaulwan ti Civil Aviation Authority of the Philippines ti seguridad iti Loakan Airport bayat a bantayan met ti Aerospace Vehicle Systems Institute Group ti eroplano a pagluganan dagiti beauty queens ken dagiti organizers.
Mainaig iti daytoy, nainget ti panagsagana dagiti napili a pulis a mangipaay iti seguridad iti uneg ti Baguio Country Club a nagpadait pay iti toxedo ken formal wear nga aramaten dagitoy iti naisangsangayan nga aktibidad ti Miss Universe ditoy siudad.
