Ngumat-ngato ti fire incidents a mailislista ti provincial Bureau of Fire Protection ita a tawen nu idilig idi napalabas a tawen.
Iti pannakiuman ti Bombo Radyo iti provincial director ti Buearu of fire protection ti Benguet, kinunana a nagsasarunu ti napasamak nga uram idi Enero ken Pebrero iti agdama a tawen.
Maibasar iti datos dagitoy, dumanon iti 17 nga insidente ti uram ti nailista dagitoy manipud Enero agingga iti Pebrero iti agdama a tawen.
Ti nasao a datos ket nangatngato no idilig iti lima a fire incident idi napalabas a tawen.
Sigun iti nasao nga ahensia, nailista nga insidente ti uram iti Munisipyo ti Itogon a dumanon iti 10; sarunuen ti munisipyo ti La Trinidad nga addaan iti tallo; dua iti munisipyo ti Mankayan; tag-maysa iti iti munisipyo ti Atok, Bokod ken Kapangan.
Kabayatanna, inaklon ti BFP CAR Benguet Provincial Office a saanda a kabaelan a pondoan ti helicopter wenno chopper a maaramat para ti panagresponde kadagiti forest fire.
Nupay kasta, nakasagana ti Office of Civil Defense (OCD) a mangipaay iti helicopter iti kanito a kasapulan dagitoy.//Bombo Noveh Organo
