Nagpakdaar ti Food and Drug Administration (FDA) iti publiko, a saan a gumatang kadagiti peke a bersion ti innem a nalatak nga agas a posible a mangpataud iti peggad wenno pannakadangran kadagiti konsumidor.
Karaman kadagiti nabigbig a brands-name dagiti agas a Medicol Advance, Bioflu, Tuseran Forte, Kremil-S, Alaxan FR ken Biogesic.
Malaksid iti dayta, nagpakdaar ti nasao nga ahensia kadagiti establisimiento ken drug outlets a saanda nga aglako wenno mangipaay kadagiti peke a produkto, agsipudta mapilaan iti asinoman a maduktalan nga aglaklako iti peke nga agas iti umno a kaso.
Kabayatanna, indagadag iti Food and Drug Administration (FDA) kadagiti local government units ken law enforcement agencies a siguraduenda, a saan a maipaay dagiti nasao a produkto kadagiti lokalidad wenno lugar a masakupanda dagitoy.
Sigun iti nasao nga ahensia, gumatang laeng iti agas manipud kadagiti establisimiento a lisensiado ti Food and Drug Administration (FDA).
