Impakaamo ni President Ferdinand Marcos Jr. a nangipaulog ti Court of Appeals (CA) iti freeze order kadagiti bank account, sanikua, ken air assets dagiti kontraktor ken dua a mammanday-linteg a mainaig kadagiti naanomalyaan a flood control projects.
Saklawen iti freeze order dagiti account ken assets ti Silverwolves Construction Corporation ken Sky Yard Aviation Corporation.
Saklawen pay iti pammilin ti CA ti personal account ken assets dagiti indibidual a da Benguet Representative Eric Yap ken ti kabsatna a ni ACT-CIS party-list Rep. Edvic Yap.
“Kailangan natin ang mga freeze order na ito para hindi maibenta ang mga ari arian at para maibalik natin sa ating mga kababayan ang bawat pisong pinaghihinalaang ninakaw.”
President Ferdinand Marcos Jr.
Sigun iti Presidente, dumanon iti nasurok P16 billion a gatad ti transaksion ti simrek iti account iti Silverwolves manipod 2022 agingga 2025, a kaaduan ket adda pakainaiganna iti flood control projects iti Department of Public Works and Highways.
Pakabuklan a 280 a bank accounts ti agdama a “frozen,” kasta metten ti 22 nga insurance policies, karaman ti tallo a securities accounts ken walo nga air assets iti kompania, eroplano, helicopter a nainaig iti Sky Yard Aviation.
Maipalagip nga idi Oktubre, innaganan ni Ombudsman Jesus Crispin “Boying” Remulla ni Eric Yap kas “person of interest” nga adda pakainaiganna iti nabayadan ngem saan a nalpas a flood control projects idiay La Union babaen iti maysa a kompania a sigud a kukuana.
Sigun kenni Remulla, nakaawat da Edvic Yap ken Bulacan Rep. Salvador Pleyto iti kuarta babaen iti bank transfers manipod kadagiti kontraktor a da Curlee ken Sarah Discaya.
Nupay kasta, pinaglibakan daytoy ni Pleyto.
Pinaglibakan metlaeng ni Eric Yap nga adda pakainaiganna iti naanomalyaan a flood control projects kalpasan a nadakamat ti naganna bayat ti panagdengngeg ti Senado idi Setiembre.
