BAGUIO CITY – Impeksa dagiti mammanday linteg ti probinsia ti Benguet ti nainget a panangtubngarda iti Senate Bill 2169 a mangisaksakad iti panakabukel ti Baguio-La Trinidad-Itogon-Sablan-Tuba-Tublay (BLISTT) Development Authority.
Inaprobaran dagiti miembro ti Benguet Provincial Board ti maysa a resolusyon a mangtubtubngar iti nasao a gakat.
Kinuna ti Provincial Board nga awan ti aniaman a pudpudno a panakakonsulta dagiti nainsigudan a tattao ken nainsigudan a komunidad iti Benguet ken Baguio City ken dadduma pay a sektor a sakupen ti nasao a gakat.
Innayon ti resolusyon a konkontraen ti gakat ti Indigenous Peoples’ Rights Act of 1997 a mangbigbigbig iti karbengan dagiti nainsigudan a tattao ti Baguio ken Benguet, partikular ti prinsipyo ti otonomiya.
Impeksada a ti kayatda ket ti konsepto ti panagwaywayas ken inter-cooperation dagiti lokal a gobyerno, saan a maysa nga otoridad a mangimatoin iti provincial government.
Immunan nga impeksa ti dadaulo ti Cordillera Regional Development Council nga adu kadagiti probisyon ti gakat ti saan a kanunungan wenno tubngaren dagiti opisyales iti masakupan ti BLISTT.
