BAGUIO CITY – Naragpat manen ti maysa nga addang iti kampanya para iti nadaldalus, nataltalged ken nalawlawag a kalkalsada iti pagilian.
Daytoy ket kalpasan a naaprobaran iti maikatlo ken maudi a panagbasa iti Kamara ti gakat nga impila ni Baguio City Representative Mark Go para iti daytoy.
Puntiya ti House Bill 4222 a nasukatan iti House Bill 8202 ti panakaimandato ti umno a panakaimuntar ken panakamintinir ti overhead electric distribution, communication lines ken istruktura dagiti amin nga electric distribution, cable ken telecommunications companies para iti kinatalged ti publiko.
Iti 199 a pabor a botos, naibilin ti panangisumitir ti Secretary-General ti Kongreso iti nasao a gakat sadiay Senado para iti umno nga aksion dagiti senador.
Sigun kenni Representative Go, impilana ti gakat kas sungbat kadagiti pakaseknan kadagiti agsasallupang, nakawayway ken nababa a kable ken linya ti kuryente kadagiti poste kadagiti siudad ken urban areas a mangituntunda iti peggad iti publiko ken agbalbalin nga eyesores.
Apaman a mapagbalin daytoy a linteg ket responsibilidad dagiti public utilities a mangisimpa kadagiti spaghetti wires ken kable ditoy pagilian.
