BAGUIO CITY – Natiliw ti maysa a gangannaet nga estudyante iti uneg ti ab-abanganna a lodge sadiay Bakakeng Central, Baguio City gapu iti panag-imetna iti iligal a droga idi rabii ti Biyernes, April 16, 2021.
Nabigbig daytoy a ni Bahbry Turki Sultan Mohammed Bahbry, 24-anyos, tubo ti Yemen ken estudyante ti maysa kadagiti unibersidad ditoy Baguio City.
Maibasar iti report ti pulisya, nagpatulong iti pulisya ti manager ti nasao a lodge seknan iti gangannaet a nag-check in sadiay iti dua nga aldaw ngem nagkedked nga agbayad.
Inreport pay ti manager a saan pulos a rimrimwar ti nasao a gangannaet iti silidna ken saan a nagpapaitulod ti taraon.
Dagus met a nagresponde dagiti pulis ken nadanunanda ti manager ken ti gangannaet nga agsinsinnungbat seknan iti babayadan daytoy.
Nakita pay dagiti pulis ti maatap a marijuana nga aggatad ti mapattapatta a P1,200 ken drug paraphernalia a nagkaiwara iti kama ti gangannaet a nagresulta iti panangtiliwda iti daytoy.
Sumangsango metten ti nasao a gangannaet iti kaso a panaglabsing iti RA 9165 wenno ti Comprehensive Dangerous Drugs Act of 2002.
