Impetteng ti Denmark a saan a mailaklako ti Greenland kasaruno ti panangipeksa ni United States President Donald Trump iti panggepna a kontrolin daytoy.
Nagballaag pay ti Scandinavian country nga anyaman a tignay iti pwesa militar iti Estados Unidos tapno maalada ti Greenland ket mangitunda iti pangta iti US national interest ken posible a panagpatengga iti Nato military alliance.
Maipalagip nga impetteng ni Trump nga agtultuloy ti panagreggetda iti tarigagay dagitoy a kontrolin ti nasao nga autonomous island territory nu sadino, kinunana a nu saanda a maisakad daytoy iti nalaklaka a pamay-an ket ipatungpalda ti inladawanna nga hard way wenno ti panagaramat iti pwersa militar.
Innayon ni Trump a kasapulan a dagitoy ti mangkontrol iti nasao a kadaklan a nga isla iti sangalubungan gaputa patienna a nu saanda nga aramiden ti nasao a tignay ket kontrolin daytoy ti China wenno ti Russia.
Ti Greenland ket autonomous territory iti Denmark nu sadino, masarakan daytoy iti nagbaetan ti North America ken Arctic rason a makitkita a napintas a lokasyon iti missile warning system ken para iti panakamonitor dagiti vessel iti nasao a rehion.
Mainaig iti dayta, manamnama met a makitaripnong ni US Secretary of State Marco Rubio kadagiti opisyales iti Denmark maipapan iti nasao a tarigagay inton umay a lawas.
