BAGUIO CITY – Nadangran ti dua nga indibidual kalpasan ti panagpinnaltog ti grupo ti mayoralty candidate ken ti grupo ti presidente ti Association of Barangay Captains (ABC) sadiay Tayum, Abra idi agsapa kalman, April 23.
Maibasar iti impormasyon a naala ti Bombo Radyo, immuna a nagbinnara ti live-in partner ni Barangay Captain Walter Tugadi ken ti mayoralty bet a ni Joey Brillantes kabayatan ti panagkampanya ti grupo ti nasao a kandidato sadiay Budac, Tayum.
Nagdesisyon ti live-in partner ni Tugadi a pumanaw laengen.
Nupay kasta, maatap a killaat a pinaltogan ti grupo ni Brillantes ti lugan da Tugadi isut gapuna a nagbales dagitoy.
Naamuan nga iti kampo ni Brillantes, nadaplisan iti bala ti paset ti ulo ni Rexander Bolosan Echave, 36-anyos ken residente ti Velasco, Tayum, Abra.
Naamuan met nga iti kampo ni Tugadi ket natamaan ti saka ni Alvin Padagas, 23-anyos ken barangay tanod ti Barangay Budac.
Naala iti nakapasamakan ti insidente ti 28 a basyo ti bala ti caliber 45 ken 11 a basyo ti bala ti M-16 rifle.
Maitudtudo a pulitika ti rason ti nasao nga insidente ngem im-imbestigaran paylaeng dagiti otoridad ti dadduma pay a posible nga anggulo ti insidente.
Kinordon met ti pulisya ti maysa a lugan tapnu maiserbian ti search warrant gaputa mapapati nga adda ti paltog iti uneg daytoy. (with Bombo Radyo Vigan)
