BAGUIO CITY – Maatap nga in-harass dagiti supporters ti re-electionist a mayor ti Bangued, Abra ti grupo ti provincial board member sadiay a kandidato iti kinabise-gobernador ti nasao a probinsia.
Maibasar iti salaysay ni Abra provincial board member Ana Marie Afable Bersamin, napasamak ti insidente iti agarup alas sais trenta idi rabii kalman.
Nailanad iti report nga agin-inana ni Bersamin ken dagiti supportersna iti balay ti managan Ising Castillo sadiay Sinapangan, Zone 6, Bangued, Abra idi dimteng ti dua a lugan.
Simmardeng dagiti lugan iti tengnga ti kalsada ken bimmaba ti agarup nasurok 40 a nakasuot ti masks a supporters ni Bangued Mayor Dominic Valera, pakairamanan ti dua a nabigbig a da Joseph Pilor ken Jojo Delos Santos.
Nagpukkaw dagiti nasao a supporters ti mayor ken papa-asidegenda kadakuada ti grupo ti board member ngem saan dagitoy nga inkankano ti nasao a grupo.
Kalpasanna, imbilin ni Bersamin kadagiti supporters ken iti gwardiana iti ipapanawda ngem saanda a makadalan iti kalsada gaputa nakabangen ti dua a lugan.
Kinasarita ti police escort ti kandidato dagiti nasao a supporters ni Valera agingga a pimmanaw dagitoy.
Dagus met a nagreport iti istasyon ti Bangued PNP ti kampo ni Bersamin.
(UPDATE) Naikamangen iti Provincial Joint Security Coordinating Council ti Abra ti nasao a kaso.
Iti panakiyuman ti Bombo Radyo Baguio, kinuna ni Bangued Election Officer Atty. John Paul Martin a maipasidong iti assessment ken imbestigasyon ti nasao nga insidente.
Kinunana a no mapaneknekan a pudno ti insidente ket isumitirda ti resulta iti Regional Joint Security Coordinating Council para iti kanayonan a validation ken imbestigasyon.
Inayonna a no anyan to ti resulta ket isu ti pagbasaran ti regional council no irekomendarda ti panakaingato wenno panakaibaba ti kategorya sadiay seknan iti election hotspots.
– timek ni Bangued Election Officer Atty. John Paul Martin iti panakiyuman ti Bombo Radyo Baguio
Nupay kasta, dinakamat ni Atty. Martin nga iti report kenkuana ti hepe ti Bangued PNP ket awan ti harassment a napasamak nupay posible a nabutngan ti complainant gapu iti kaadu dagiti nasao a supporters ti naireklamo a mayor.
Sigun kenkuana, nagberipikar dagiti pulis ngem awanen dagiti nadanunda kadagiti naireklamo nga indibidual.
Nagyaman met daytoy gaputa awan dagiti nadangran ken awan ti timmaud a rinikiar iti nagbaetan ti dua a grupo.
