BAGUIO CITY – Agkidkiddaw ita iti pammalawag manipud iti Cordillera Career Development College (CCDC) ti maysa a guardian kalpasan a mapapati a nabagsak ti kaannakanna ken dagiti sangapulo ket tallo pay a 3rd year nursing student iti umuna a semestre ti school year 2024-2025.
Sigun iti maysa a guardian, imbagsak ti maysa a tutor wenno clinical instructor ti kaannakanna ken dagiti dadduma pay a kaklase daytoy.
Kinunana a kanayon met nga agat-atendar iti klase ti kaannakanna ken kompleto pay ti panagdutyna iti ospital kas paset ti internship dagitoy.
Impeksana a malidayan daytoy para kadagiti padana a guardian wenno nagannak agsipud ta saan a nalaka ti agbayad iti rinibribu a gatad ti tuition fee.
Innayonna pay a sumagmamano kadagiti nagannak ti nag-utang ken adda pay ti nangisalda kadagiti sumagmamano a kagawaanda tapno mabayadan laeng ti tuition fee dagiti annakda.
Sigun pay iti maseknan, ti pannakabagsak dagiti estudyante ket nakadependar iti umno a panangiwanwan wenno panangisuro ti Clinical Instructor.
Inaklonna a naupay daytoy agsipud ta impagarupna a maipaayan iti “quality education” ti kaannakanna nga agad-adal iti nasao a pagadalan.
Kabayatanna, pinadas met ti Bombo Radyo nga alaen ti benneg ti CCDC mainaig iti nasao nga isyu ngem nagkedked dagitoy nga agpainterview gapu iti internal protocols ken procedures a sursuroten dagitoy.
Nupay kasta, kinuna ti maseknan a pagadalan babaen iti text message a sinungbatandan ti nasao nga isyu nu sadino nangipatulodda payen iti mensahe kadagiti maseknan a nagannak ken nangipatungpalda pay iti conference.
Impanamnamada met a kitaenda ti pagsayaatan dagiti estudyanteda.
