Saan a mai-livestream dagiti panagdengngeg iti Independent Commission for Infrastructure (ICI) tapno maliklikan ti trial by publicity ken daduma pay nga impluwensya iti pulitika sigun iti executive director daytoy a ni Brian Keith Hosaka.
Sigun kenni Hosaka, ti nasao a tignay ti adda iti polisiya iti komisyon nu sadino,dagiti inisyal a panagdengngeg ket para iti case build-up para iti criminal, civil, ken administrative action.
Kinuna ni Hosaka nga ammo ti komisyon ti kiddaw ti publiko a mai-livestream dagiti panagdengngeg ngem impettengna a kasapulanda pay daytoy a talantanen para iti panakabalanse ti kiddaw para iti transparency ken para iti proteksyon iti individual rights.
Impanamnama daytoy nga imbestigaran ti komisyon dagiti amin a maatap a naanomalyaan a flood control projects tapno masigurado a maiserbi ti accountability seknan iti panakaaramat dagiti pondo para iti publiko.
