Pinaglibakan ni sigud a House Speaker Martin Romualdez a daytoy ti mastermind iti dakkel a corruption scheme iti pagilian.
Sigun kenni Romualdez, immuna a pinilina ti agulimek kas panagraem iti legal a proseso ken tapno maliklikan a mainayun iti kinaariwawa ti isyu.
Nupay kasta, kinunana a maab-abuso daytoy.
Impetteng ti sigud nga Speaker a nakitintinnulong manipud idi rugi ti kontrobersia; simmango kadagiti otoridad ken saan a nagtalaw wenno naglemmeng.
Kinunana pay a boluntario a nangipila iti affidavit iti Independent Commission for Infrastructure (ICI) ken nangipaay kadagiti kasapulan a dokumento.
Tapno mapaneknekan ti kina-transparencyna, imbilinna ti dagus a public release ti affidavit-na.
Daytoy ket tapno ti publiko mismo ti mangikeddeng no siasino ti mangibagbaga iti pudno ken no siasino ti biktima iti politika.
Inawagan pay ni Romualdez a “most absurd accusation” ti akosasyon a daytoy ti mastermind iti kurapsion, nangruna no maipapan iti pondo ti publiko.
Inlawlawagna ti proseso ti panagdraft iti badyet no sadino, agtataud ti singasing iti Executive department kas National Expenditure Program sakbay a naisubmitir iti Kongreso.
Innayon ti mammanday-linteg a ti Kamara ket buklen ti ginasut a kameng ken addaan iti 85 a komite.
Gapu iti dayta, kinunana nga imposible a makontrol ti maysa nga Speaker ti tunggal komite wenno mangidiktar kadagiti dadduma a sangay ti gobierno.
